HyFoSy gydag Ewyn ExEm®: Prawf uwchsain modern o’r groth a’r tiwbiau ffalopaidd

Yn West Wales Women’s Wellbeing, rydym wedi ymrwymo i ddarparu’r profion diagnostig modernaf, sy’n seiliedig ar dystiolaeth, i fenywod ledled Gorllewin Cymru. Wrth i’n gwasanaethau barhau i ddatblygu, rydym yn falch o gynnig HyFoSy (Hysterosalpingo-Foam Sonography) gan ddefnyddio Ewyn ExEm® – prawf uwchsain datblygedig sy’n asesu’r groth, ceudod y groth a’r tiwbiau ffalopaidd heb yr angen am belydrau-X nac aros yn yr ysbyty.

Yn draddodiadol, byddai menywod oedd angen asesiad o’r tiwbiau ffalopaidd yn cael HSG (Hysterosalpingogram) mewn adran radioleg ysbyty. Er bod HSG yn parhau’n brawf pwysig, mae HyFoSy yn cynnig ffordd wahanol o asesu’r tiwbiau ffalopaidd, gan ddefnyddio uwchsain yn hytrach na phelydrau-X. Gan ei fod yn cael ei wneud o dan arweiniad uwchsain drwy gydol y prawf, nid oes angen pelydrau-X na chyferbyniad ïodin, ac mae’n galluogi asesu’r pelfis yn fwy cynhwysfawr yn ystod yr un apwyntiad.

Yn hytrach na dangos a yw’r tiwbiau’n agored yn unig, mae HyFoSe yn rhoi cyfle i gael golwg fwy cyflawn ar iechyd eich pelfis. Yn ystod yr un ymweliad, byddwn yn cynnal sgan uwchsain trawsffaginaidd manwl i asesu’r groth, yr ofarïau a’r strwythurau cyfagos. Mae hyn yn galluogi canfod nifer o gyflyrau a allai gyfrannu at symptomau neu effeithio ar ffrwythlondeb, gan helpu i roi darlun mwy cyflawn o’ch iechyd gynaecolegol.

Mwy na phrawf ffrwythlondeb

Er bod HyFoSy yn fwyaf adnabyddus fel rhan o ymchwiliadau ffrwythlondeb, mae ei ddefnydd yn llawer ehangach.

Gall fod yn briodol wrth ymchwilio i:

• Anhawster beichiogi neu gynllunio triniaeth ffrwythlondeb.
• Camesgoriadau dro ar ôl tro.
• Poen yn y pelfis.
• Endometriosis a amheuir.
• Hanes o haint pelfig.
• Hanes beichiogrwydd ectopig.
• Llawdriniaeth flaenorol ar y pelfis neu’r abdomen.
• Cyn rhai triniaethau neu weithdrefnau gynaecolegol.
• Amheuaeth o annormaleddau cynhenid y groth.
• Ymchwilio ymhellach ar ôl canlyniad annormal ar sgan uwchsain.

Drwy gyfuno asesiad o’r tiwbiau ffalopaidd â sgan pelfig cynhwysfawr, gall HyFoSy helpu i roi darlun mwy cyflawn o iechyd gynaecolegol yn ystod yr un apwyntiad.

Pam mae llawer o fenywod yn dewis HyFoSy?

Mae HyFoSy yn cynnig nifer o fanteision:

• Dim defnydd o belydrau-X nac ymbelydredd ïoneiddio.
• Dim angen am gyferbyniad sy’n cynnwys ïodin.
• Caiff y prawf ei wneud o dan arweiniad uwchsain drwy gydol y driniaeth.
• Fel arfer mewn clinig cleifion allanol cyfforddus.
• Dim angen anesthetig cyffredinol.
• Trafodaeth am eich canlyniadau gyda chlinigydd arbenigol ar ôl y prawf.
• Asesiad llawn o’r groth, yr ofarïau a’r pelfis yn ystod yr un ymweliad.
• Gall helpu i nodi cyflyrau a all gyfrannu at symptomau neu effeithio ar ffrwythlondeb.
• Defnyddir Ewyn ExEm®, sydd wedi’i ddatblygu’n benodol i helpu i weld y tiwbiau ffalopaidd yn glir drwy uwchsain.
• Mae’r rhan fwyaf o fenywod yn profi anghysur ysgafn tebyg i boen mislif am gyfnod byr yn unig.

Mae llawer o gleifion hefyd yn gwerthfawrogi’r awyrgylch tawelach a mwy personol sydd ar gael mewn clinig iechyd menywod arbenigol.

Pam dewis West Wales Women’s Wellbeing?

Ein nod yw darparu gofal arbenigol o’r safon uchaf yn nes at adref.

Rydym yn cynnig ymchwiliadau dan arweiniad ymgynghorydd gan ddefnyddio’r dechnoleg uwchsain ddiweddaraf, mewn amgylchedd croesawgar a chefnogol. Wrth i’n gwasanaethau ehangu, rydym yn cyflwyno profion diagnostig arloesol sydd, tan yn ddiweddar, wedi bod ar gael yn bennaf mewn canolfannau ysbyty mawr neu unedau ffrwythlondeb arbenigol.

Mae pob apwyntiad HyFoSy yn cynnwys amser i wrando ar eich hanes meddygol, egluro’r weithdrefn, trafod eich canlyniadau’n fanwl ac, os oes angen, cynllunio’r camau nesaf. Lle bo’n briodol, gallwn hefyd ddarparu ymchwiliadau neu driniaethau pellach o fewn ein gwasanaethau iechyd menywod cynhwysfawr.

Beth i’w ddisgwyl…

Mae’n hanfodol nad oes unrhyw bosibilrwydd eich bod yn feichiog pan fydd y driniaeth hon yn cael ei chynnal. Os oes unrhyw bosibilrwydd eich bod yn feichiog, bydd angen aildrefnu’r driniaeth.

Mae’r weithdrefn fel arfer yn cymryd tua 20–30 munud. Rydym yn argymell cymryd cyffur lladd poen sydd ar gael heb bresgripsiwn tua 30 munud cyn eich apwyntiad.

Ar ôl cynnal sgan uwchsain manwl, caiff cathetr mân ei osod yn ofalus drwy geg y groth. Yna caiff ychydig bach o Ewyn ExEm® ei roi i mewn i geudod y groth, tra bydd yr uwchsain yn dangos sut mae’r ewyn yn llifo drwy’r tiwbiau ffalopaidd mewn amser real.

Fel arfer, gallwch ddychwelyd i’ch gweithgareddau arferol yr un diwrnod.

Gofal iechyd menywod sy’n canolbwyntio arnoch chi

P’un a ydych yn ceisio beichiogi, yn ymchwilio i symptomau pelfig neu’n chwilio am atebion ynghylch eich iechyd atgenhedlol, ein nod yw darparu ymchwiliadau modern, esboniadau clir a gofal tosturiol.

Rydym yn falch o ehangu’r gwasanaethau diagnostig datblygedig sydd ar gael yn West Wales Women’s Wellbeing, gan helpu menywod ledled Gorllewin Cymru i gael mynediad at ofal arbenigol heb yr angen i deithio’n bell nac aros yn ddiangen.